Freud · Love · Movies

電影心理學:明明鍾意卻表現相反

收睇「Stephanie 電影心理學」: https://www.youtube.com/watch?v=ZDIe_orOW4s 今次「Stephanie 電影心理學」要同大家講嘅電影, 原來已經有14年歷史, 雖然係2003年嘅作品 ,但自從上影之後, 每年嘅聖誕節好多人 都會重提呢一套電影,甚至拎返隻碟出嚟睇。呢套電影就係「Love Actually 真的戀愛了」。 呢套電影係由幾個小品故事組成  有愛情、友情、親情。今次要講嘅係呢一個小品故事。故事係咁嘅: Mark 同埋 Peter 係死黨 。Peter結婚啦,Mark當然係伴郎,仲做埋 camera man 負責揸機拍低婚禮過程。Peter嘅新婚太太 Juliet,想睇返結婚當日嘅錄影片段,但係Mark一直唔肯比返套影片Juliet。 終於,Juliet 忍唔住衝上去Mark屋企,問 Mark 點解一直咁唔憎自己,點解一直都唔瞅唔睬,眼尾都唔會望下自己,係唔係因為自己同 Peter 拍拖然後結婚,就等如搶左 Mark 嘅死黨?Mark 當然推搪話唔係,只不過搵唔到婚禮嘅影片啫。點知比 Juliet 一摷就摷到出嚟。Juliet 好開心,仲即刻要睇套影片睇下自己結婚當日有幾靚嘛。點知一睇個video,Juliet 就發現, Mark一直都剩係影住自己。果一刻,Juliet 先至知道原來Mark唔係憎自己,而係一直暗戀自己。 Mark 明明鍾意Juliet, 照計 應該對 Juliet 特別好先至係㗎嘛 ,但係,點解會相反, 對Juliet特別差,唔睬唔理,眼尾都唔望? 我哋可以用佛洛伊德嘅 defence mechanism 嘅其中一種「心理防衛機制」reaction formation「反作用」去解釋。 Reaction formation 嘅意思就係,做出與內心相反嘅行為。 咁點解會做出相反行為呢 ?因為當我地,接受唔到自己係一個咁樣嘅人,內心會出現焦慮不安, 潛意識做出相反嘅行為,令自己,同埋其他人,都覺得自己唔係一個咁樣嘅人。 用番 Mark 嘅例子去解釋,佢明明係鍾意 Juliet,但係與此同時,自己嘅死黨Peter,都同時鍾意 Juliet,Mark 接受唔到自己同死黨爭女仔,覺得自己唔應該做埋啲咁樣嘅嘢,內心出現焦慮不安。為咗減低 呢d 焦慮不安,Mark… Continue reading 電影心理學:明明鍾意卻表現相反

Holistic development

《Missing Piece Meets The Big O》

《Missing Piece Meets The Big O》雖然係兒童讀物,但又有幾多個成年人明白當中道理。

Missing Piece 坐喺度等人帶佢走。 佢遇到唔同嘅人:
– 有夾嘅人,但係唔可以一齊向前
– 有可以帶佢向前嘅人,但係兩個人唔夾
– 有人唔識互相遷就
– 有人太脆弱
– 有人一遇到挫折,冇諗住去解決,就放低 Missing Piece,自己走
– 有人自己本身太多缺失,根本填補唔到
– 亦有人太濫、只想最緊要就手、或者太急進
– 又有人已經搵到拍檔向前行,冇注意 Missing Piece 嘅存在
– Missing Piece 嘗試做啲嘢吸引別人注意, 但唔成功
– 佢再嘗試誇張啲去吸引別人,但係嚇走咗怕醜嘅人

佢終於搵到一個同佢夾,又可以帶住佢向前嘅人。日子久了,Missing Piece 漸漸長大,佢哋兩個開始唔夾。 終於有一日對方話冇諗過佢會長大,當然 Missing Piece 自己都冇諗過。但係人始終會因為長大而改變。 對方想搵一個唔會長大同埋改變嘅人,所以對方就走咗啦。

有一日,有一個與別不同嘅人出現。Missing Piece 問對方:「有咩可以效勞?」
對方答:「無。」
Missing Piece 再問:「 咁你需要我做啲乜嘢?」
對方答:「無。」
Missing Piece 問對方叫咩名,對方話自己叫「Big O」。
Missing Piece 話:「 你就係我一直等緊嘅人。或者我就係你嗰塊缺失嘅一角。」
但 Big O 話:「 我冇缺失,所以冇位畀你。」
Missing Piece 好失望,問:「 咁我可唔可以同你一齊向前。」
Big O 一口拒絕,但係提議 Missing Piece可以自己向前。
Missing Piece 唔相信自己嘅能力可以唔靠別人自己獨立向前。
Big O 反問佢有冇試過?
Missing Piece 解釋話自己有太多稜角,而且無條件可以向前。
Big O 話:「 稜角可以磨平,跟住形狀就會轉變。我要走啦,或者將來我哋有機會再見。」

Missing Piece 又再一次自己一個坐喺度,一坐就坐咗好耐。 佢決定嘗試用自己嘅力量向前,雖然辛苦但仍然努力。慢慢地佢嘅稜角開始變圓,佢繼續堅持,形狀開始慢慢變圓。佢由最初笨拙,變成憑自己嘅努力獨立向前。

佢真係再次遇見 Big O,今日嘅 Missing Piece 唔再需要等別人帶佢走,而係可以同 Big O 手拖手肩並肩,自立並自豪地與 Big O 一齊向前。 唔係一個依賴嘅關係,而係互相扶持互相鼓勵向前進。

Holistic development

9個習慣改善精神健康

日常生活習慣原來對我哋嘅精神健康都會有影響。試試改變以下9個生活習慣,去改善精神健康。

1. 行路姿勢:我成日都話我哋嘅身心係互動嘅,如果你行路嘅時候寒哂背,頭耷耷,會影響心情,諗嘢都負面啲。相反,行路岳高頭,挺起胸膛,昂然闊步,會令到心情愉快啲,個人有自信啲,諗嘢都正面啲。

2. 用心感受:智能電話有相機真係好方便,食嘢嘅時候都要相機先食,美食當前,唔影低佢咪好快唔記得食過咩囉。 去遊山玩水,風景美麗,唔影低佢咪好快唔記得囉。好難得同bb豬去玩,枱又影,碗又影,花草當然要影,階磚唔係唔影下化,唔影咪好快唔記得囉。但係,研究發現,係又影唔係又影,反而會更容易唔記得。因為影相的時候精神專注在影相,而無 pay attention 去記住果樣野。當我地覺得某樣野值得記念,其實唔單只係果一樣野,周圍環境人與事及氣氛,都會幫助令到果樣野更加美麗而值得記念。但諗住影底咪記得囉的心態,會令我地無留意周遭協助令到果樣野美麗嘅野,所以我地記得嘅係張相,唔係當時嘅果樣野。相反,如果真係想記住一啲美好時光,美麗事物,最好嘅方法,放底個電話,一事一物用心感受。

3. 做運動:活躍做運動,尤其做帶氧運動,或者同一啲朋友一齊玩嘅運動,例如打波、行山,可以減低患上抑鬱症嘅機會。而不活躍做運動嘅人,會比較容易有抑鬱嘅症狀。即使城市人生活繁忙,都可以從生活中做運動, 例如搭地鐵,行商場嘅時候,或者公司環境許可的話 (比如在學校環境返工),都可以選擇行樓梯,而唔係搭電梯。

4. 停止拖延:有冇試過因為唔想做某些工作,就會拖延到 deadline 之前先做,希望盡量減低對住嗰份工作的時間,以為咁樣會令到自己好過啲?實際卻相反。因為在拖延的時間,內心一直會記住有工作未完成。(要睇睇我寫的 Zeigarnik Effect) 而每一次想起那份工作,除了厭惡,還會覺得緊張,一味心掛掛。所以,如果嗰份工作一定要做嘅話,試試放低情緒,唔好理鍾意定唔鍾意,快快手完成佢,咁就真係可以對住嗰份工作短啲時間之餘,又唔會有拖延的焦慮。

5. 放低一段毒害你嘅關係:如果你嘅伴侶事事挑剔,覺得你呢樣唔啱嗰樣唔好,唔會欣賞你,亦唔識珍惜你,你同佢一齊變得好無自尊。想想,如果你見到親人或好朋友在一段關係入面,心靈或者身體受傷害,你會比乜嘢意見佢?你唔會希望佢不斷接受身心靈的傷害嘛。

6. 充足睡眠:睡眠不足,不但影響身體健康,認知功能,亦會影響情緒。想要身體健康及精神健康早啲瞓啦。

7. 要有私人時間:城市人時間好似唔係自己咁嘅,返工有同事,放工搵朋友,返到屋企有父母、伴侶、仔女。。。完全無 me-time。抽啲時間出嚟靜靜地與自己相處,一個做一啲輕鬆及有興趣嘅嘢,平靜心靈減低焦慮或抑鬱嘅機會。

8. 減低使用電子屏幕產品:例如,電腦、手提電話,用得多影響我哋身體健康,例如頸痛背脊痛,大家都理解,原來亦會影響我哋認知能力及情緒。 可參考衛生署家庭健康服務,兒童與電子熒幕產品:http://www.fhs.gov.hk/…/health_…/OMP_eNewsletter/screen.html
雖然內容計對兒童,但亦可 apply 到成人。

9. 減低 multitasking:打邊爐嘅時候,筷子夾住肥牛擺落個鍋度,個口不斷同其他人傾計,眼就望住出面睇下自助吧加咗菜未,同時眼尾就望住啲細路,耳仔聽到電話收到訊息,另外嗰隻手就拎電話,睇返肥牛得味嘅同時,眼尾望到侍應行過大叫佢加湯。。。好多人會以為能夠 multitasking 等於嗰個人醒目。但係研究發現 multitasking 只會削弱你嘅認知功能。長時間 multitasking 會減低你嘅高階思維能力,例如專注力、分析力、組織能力、計劃能力,亦會削弱深入思考嘅能力。Multitasking 亦會提高你嘅壓力水平。例如唱錢黨,問你呢樣果樣,要你收錢,又趕時間催你唱錢,跟住又話唔要邊件貨,之後又話加返乜嘢,令到條數好亂,再話趕時間催你快快快啲唱錢比佢走。或者聲東擊西嘅手法,就係專登做到同一時間好多野發生,令到你要 multitasking,當你 multitasking 嘅時候,就削弱咗你嘅認知功能,令到你混亂,影響記憶唔記得佢比咗錢你未,影響注意力冇留意你唱咗幾多錢比佢。所謂食不言寢不語,就係叫你要專注,唔好 multitasking。

Freud

Psychosexual stages of development

昨天是 11 月 11 號 Remembrance Day,睇到以下 post 嗰句「那些口腔期國家」真係笑左。不如等我講下咩叫做口腔期啦。

https://www.facebook.com/readbeforeuspeak/photos/a.1497734167145399.1073741833.1490131274572355/1937543099831168/?type=3&theater

 

根據 Sigmund Freud 佛洛伊德嘅 psychosexual stages of development,人類成長發展有以下5個階段:

  1. Oral stage 口腔期,大約由出世至2歲,呢個階段快感來自嘴部,即是bb仔鍾意食嘢,啜奶咀,令到佢哋覺得安慰,同埋有安全感。
  2. Anal stage 肛門期,大約由2歲至3歲,呢個階段快感來自肛門,因為呢個階段係 toilet training,小朋友學習忍住便便唔好賴,去到洗手間就要放鬆放便便出嚟啦。 通常大人會覺得早戒片嘅小朋友就係叻,而有啲幼稚園都唔介意收細仔,如果細仔已經戒片的話。即是,小朋友在呢個階段,要開始學習幾時忍耐,幾時可以放出嚟。
  3. Phallic stage 性器期,大約由3歲至6歲,呢個階段嘅快感就係來自性器。有時見到小朋友會不自覺接觸自己身體嗰個部位。
  4. Latent stage 潛伏期,大約有6歲至12歲,呢個階段嘅小朋友學習有啲動作唔可以喺大庭廣眾嗰度做。而呢個階段係小學,小朋友面對好多功課,又要學習興趣班,建立學業以外的一啲技能,亦要學習社交、禮貌、禮儀等等。
  5. Genital stage 生殖期,由青春期開始直到老死都係呢個 stage 架啦。青春期開始 以後,快感制來自性關係。

 

而佛洛伊德話,人有機會 “kick住咗” 喺以上某個階段,叫做 fixation,即是一直停留喺嗰個階段,影響性格及做成心理疾病。

 

點解會 “kick住咗” 呢?

如果喺某個階段得唔到滿足,人就自然想停留喺嗰個階段,希望得到多啲滿足。或者,某個階段做得唔好,比大人鬧或比其他小朋友笑,人內心就出現 anxiety。例如遲戒片,或大個都賴尿,就會比大人鬧或比其他小朋友笑,內心出現不安。相反,在某階段過份得到滿足,人亦都想停留喺嗰個階段,因為樂而忘返。

 

“kick住咗” 喺唔同階段又會點呢?

  1. Oral stage 口腔期:鍾意咬野,例如咬筆,趙香口膠,食煙,食野,好多野講。性格一係好唔成熟,好易受騙,一係好鍾意操控別人。
  2. Anal stage 肛門期:如果在 toilet training 時,小朋友賴左,大人非常嚴厲管教甚至懲罰,小朋友嘅性格會變得過分拘謹,死板,固執,一成不變,甚至有潔癖。相反,如果大人過份放縱唔會管教,尤得小朋友賴咪賴囉,小朋友嘅性格會變得做事混亂,雜亂無章,粗心大意,冇規矩,目中無人。
  3. Phallic stage 性器期:男性會有戀母情意結 Oedipus Complex,而女性會有戀父情意結 Electra Complex。By the way, 有時無分得咁細,無論戀父定戀母,有時都會簡單叫 Oedipus Complex 就算。
  4. Latent stage 潛伏期:未能在性方面得到滿足。
  5. Genital stage 生殖期:冷感或唔得,同埋唔滿意與伴侶關係。

 

呢啲嘢,都係佛洛伊德講㗎咋,唔係我講㗎。

 

Relationship

高踭鞋的魅力

研究發現著高踭鞋可以令到女性更加吸引。

 

研究是這樣的,研究員找來一位19歲的少女穿著黑色褸,白色上衣及黑色半截裙,不過少女會分別穿平底鞋,有踭鞋及高踭鞋,在街上截停男途人叫他們幫手填問卷。

研究結果:

穿平底鞋的時候:只有 47% 的男性會願意停低幫手做問卷。

穿有踭鞋的時候:有 63% 的男性會願意停低做問卷。

而穿高踭鞋的時候:竟然有 83% 的男性會願意停低做問卷。

這顯示,當女性穿高踭鞋的時候,比較容易吸引男性停低幫手。

 

研究員再做第二個研究,今次同第一個研究差不多,但找來四位19歲的少女,他們身高,體重,鞋嘅size 都差不多,他們四位都著住同第一個研究一模一樣的衣服,亦會穿上三個不同高度的高踭鞋,他們四位分別在四個不同的地方找男士及女士做問卷。

找女性做問卷的研究結果:

穿平底鞋的時候:有 32% 的女性會願意停低幫手做問卷。

穿有踭鞋的時候:有 37% 的女性會願意停低做問卷。

穿高踭鞋的時候:有 30% 的女性會願意停低做問卷。

這個結果很有趣,當少女穿不同高度的高踭鞋的時候,願意停低做問卷的女性的 percentage 差不多,而當少女穿高踭鞋的時候,反而最少女性願意幫手做問卷。唔通女性不是太喜歡其他女士穿高踭鞋?

 

找男士做問卷的研究結果,與找女性做問卷的研究結果,有非常之大的分別。

穿平底鞋的時候:只有 42% 的男性會願意停低幫手做問卷。

穿有踭鞋的時候:有 60% 的男性會願意停低做問卷。

而穿高踭鞋的時候:竟然有 82% 的男性會願意停低做問卷。

這個找男性做問卷的研究結果,同第一個研究結果差不多,睇黎男性真係幾鍾意幫著高踭鞋的女士做問卷喎。

 

再做第三個研究,今次那四位19歲的少女,當然是著同一樣的衫及鞋。不過今次他們不是叫人幫手填問卷,而是行行下跌了一隻手套,看看有沒有人幫手執。

女路人的研究結果:

穿平底鞋的時候:有 42% 的女路人會幫手執隻手套比返個少女。

穿有踭鞋的時候:有 50% 的女路人會。

穿高踭鞋的時候:有 52% 的女會路人。

 

男路人又會否幫手執呢?

穿平底鞋的時候:有 62% 的男路人會幫手執隻手套比返個少女。

穿有踭鞋的時候:有 78% 的男路人會。

而穿高踭鞋的時候:竟然有 93% 的男路人會。

著高踭鞋的時候跌手套,竟然有接近100% 的男路人會幫手。唔通男性比女性更加喜歡幫助別人?

 

為了排除男性比女性更加樂於助人的可能,研究員再做第四個研究。今次,在第一個研究幫手的少女,被安排到三間不同的酒吧。而她每次也是穿著同一樣的半截裙及緊身上衣,當然同之前的研究一樣,會分別穿上平底鞋,有踭鞋及高踭鞋。研究員叫她單獨坐在吧檯,並叫她翹腳坐讓男性更加清楚看到她著什麼鞋,研究員則坐在一邊計時。

研究結果非常有趣:

穿平底鞋的時候:14 分鐘有男性走過去搭訕。

穿有踭鞋的時候:11分鐘會男性 走過去搭訕。

而穿高踭鞋的時候:竟然7分鐘便有男性走過去搭訕。

 

總括這四個研究的結果,女性著高踭鞋更能夠吸引男性注意,願意幫手的 percentage 極高,及好快便會行過去搭訕。

 

為什麼著高踭鞋比較吸引?因為高踭鞋個踭高的關係,女士行路時自然會挺胸收腹,亦會行得比較婀娜多姿,所以比較著平底鞋的時侯,更能夠吸引男士注意。而且著高踭鞋的時候,對腳睇落去會比較修長,同埋隻腳會細d,望落去成個人比較斯文同埋纖瘦d,所以男性好快會行過去搭訕囉。當然我不認為女性要以吸引男性為首要任務,但如果單身了很久,或好想吸引你心儀的男性,不妨試試改著高踭鞋啦。

資料來源:

https://www.psychologytoday.com/blog/all-about-sex/201612/the-uncanny-psychology-high-heels

 

Love · Movies · Social Psychology

傲慢與偏見

在英國讀書真的可以比較專心,因為好多時都好悶沒甚麼可做。我通常也留在自己房做功課,有時行行附近博物館,星期六或日去超級市場買食物及日常用品,去圖書館借 DVD 睇。

“Becoming Jane” 是我的十大喜歡電影之一。這套電影關於非常出名的英國女作家 Jane Austen。當時社會風氣傳統,不認同女性擁有自己事業,認為女性都要結婚,而且父母的積蓄全部歸於兒子,如果女性沒有結婚,便無人無物了。很多人也受社教化 (socialisation) 影響,以為結婚就是女性的唯一出路,沒有理會甚麼愛情,最緊要嫁個有錢人,讓其家人也衣食無憂,之後專心躲在大宅與其他女性圍埋一個墟。Mrs Austen 在電影裡說:Affection is desirableMoney is absolutely indispensable! 但 Jane Austen 有 independent thinking,即使求婚者非常有錢,絕對有能力令她及家人一世豐衣足食,但她寧願要一個懂得欣賞及尊重她寫作的人,堅拒嫁給不喜歡的人。她打破當時社會禁忌,最後選擇不結婚而靠寫作為生。

這套電影還有另外一個主題,把 Jane Austen 鮮為人知,亦不能夠開花結果的愛情故事帶上銀幕。Thomas Lefroy 當時將會成為一個前途無可限量的 lawyer。他兩個最初相識的時候,Lefroy 在倫敦名校讀書法律,成績好之餘,運動又叻,人又靚仔,性格又開朗,在大城市見多識廣,所以他對在鄉郊出生及長大的 Austen 的態度傲慢又串嘴,留給 Austen 的第一印象非常差,Austen 對他當然有偏見啦。之後兩個人時時針鋒相對,你串我我串你,在鬥嘴同時,兩人竟然漸漸喜歡對方。他們鬥嘴卻鬥出愛情,就像是我之前說的心理學研究及理論 misattribution of arousal 。

故事峰迴路轉,但我不在這兒講太多劇情了,大家可以用自己方式睇返這套電影。Lefroy 後來成為愛爾蘭首席大法官。Austen 成為出色的作家,以兩人的愛情故事作藍本,改編成為十分著名的小說 “傲慢與偏見” (Pride and Prejudice)。Austen 與 Lefroy 未能如小說般大團圓令我有點感慨,世事往往未能盡如人意。但如果他倆最終在一起,世人便不可能讀到 Austen 的小說,Lefroy 亦不可能攀上事業的高峰。看看這電影便知道我說甚麼了。

 

Freud · Personality · Stress

關於 Zeigarnik Effect 一問

聽眾來信問及關於 Zeigarnik Effect, 以下是問題及答案:

1) 問題:咁多成年人鐘意買/收藏玩具,仲要整個柜展示,又係唔係因為未完成的夢 (小時候買不到!)。
答案: 有機會係。但亦有機會主因唔係『Zeigarnik Effect 未完成的夢』。而係因為內心不安全感、冇自信,所以要搵啲嘢嚟填補心靈上面嘅欠缺,所以儲儲埋埋好多嘢,例如玩具。

例如集郵,就未必因為『Zeigarnik Effect 未完成的夢』。我覺得因為以前有一封信,無疾而終消失咗,而令到今時今日要集郵嘅機會比較低。

講開集郵,我諗到另外嘅原因,佛洛伊德的『自我防衛機制』入面嘅其中一種:『反作用 reaction formation』。因為內心接受唔到自己係一個咁樣嘅人,所以做出黎行為就同內心諗嘅相反。 例如,接受唔到自己係同性戀,所以行為上,就同好多異性發生關係,跟住仲要影相集郵,黎到證明比自己睇,自己咁多異性伴侶,當然係鍾意異性,而唔係鍾意同性啦。

佛洛伊德嘅『自我防衛機制』另外一種叫做:『補償compensation』。例如,發現自己爸爸原來係同性戀者,接受唔到事實,自己就同好多異性發生關係,黎到補償爸爸唔鍾意女性,再收集埋與異性影埋床照,集郵,以補償自己內心的缺失。

『情況如有雷同,實屬巧合』

其實,適當程度嘅儲野,當興趣玩下,儲少少,無可厚非。只要唔影響其他人、自己的生活、工作、人際關係、人身安全、財政、負面後果比較細等等…,冇乜太大所謂。

但如果內心空虛,無論點樣儲,都唔會儲到可以解決內心嘅空虛、欠缺,而不安全感仍然繼續,所以 一味儲嘢,儲極都唔夠。

咁就有機會成為儲物狂,hoarding。根據 DSM 5,是『OCD 強迫症』嘅一種。

 

2) 但点解我又冇呢樣習慣?好多成年女子又冇?

答案:所謂,一樣米養百樣人,心理學叫做 『individual differences』,每個人都有自己嘅性格特質,有唔同的心理因素,而且每個人都有唔同嘅問題,或者問題唔係喺儲野,而係喺其他方面表現出來都唔出奇。在世上,是無人無問題的。

相反,有時同一個心理原因,都會有唔同嘅『manifestation 表徵』,即是表面嘅行為唔同。例如,見到陌生人,或者去到陌生環境,而內心出現不安。有啲人會好靜,睇落佢唔係咁能夠適應新環境。相反,另外有啲人,好似開籠雀咁好多嘢講,仲要好似花蝴蝶咁成場周圍飛,表面睇落呢種人應該唔怕醜,非常能夠適應環境啦,但係啱啱相反,呢種出奇地多嘢講及離奇地周圍 socialise 嘅表徵,往往就係內心不安嘅表現。雖然大家內心也是對陌生產生不安,但表徵就有好明顯分別。另外,後者通常自信比較低,用嘅『自我防衛機制』都比較多,亦唔係咁喜歡自己,唔係咁認識自己,或唔係咁能夠承認自己的問題。如果唔係,都唔洗內心感覺同表面行為差咁遠啦,因為佢地自己不能承受自己內心的不安嘛。

 

3) 又或者小時候已經有那種玩具,但不間斷咁買?

答案:小朋友腦部發展的時候,會比較想有『stimulation 刺激』, 佢哋都有一個傾向,就係喜歡重複鍾意嘅嘢。例如,聽兒歌要聽好多次都唔厭,睇迪士尼卡通睇好多次都唔厭。所以兒歌通常都係節奏簡單, 而且重複又重複。