Fallacy

解讀語言偽術

1. 解讀 19 才子關於女運動員 #metoo 果啲posts,唔係叫做有 critical thinking,而係用左語言偽術。

1a. 語言偽術即 fallacy “謬誤”
1a1. Straw man,中文是 “攻擊稻草人”。意思即是:曲解對方嘅論點,針對曲解左嘅論點而攻擊對方。用人嘅語言理解釋:即是人哋都唔係咁嘅意思,夾硬話人哋係咁嘅意思,跟住再攻擊。
普通例子:女朋友話「 公司嚟咗個幾靚嘅女同事,第一日返工個個男同事都及到實」,男朋友話「靚女梗係多人望㗎喇」!女朋友話「 你而家即係話我又老又醜啫, 你實係有第三者」。即是,女朋友曲解男朋友嘅意思,再攻擊佢。

例如19 才子的 post :「見到荷里活女星個個玩得咁型乜乜乜,要跟潮流」。就是扭曲別人 #metoo 的意思為扮型跟潮流,跟住就可以攻擊別人。
1a2. Non sequitur,英文是 “it does not follow”,中文是 “不當結論”。用人嘅語言解釋:A 不是有邏輯的導致 B 出現,但就講到 B 的出現就是全因 A 而起。
普通例子:有啲香港男士話「 如果我有錢嘅話,就可以同嘉欣BB拍拖啦。」 但你有錢都唔會直接導致你可以同嘉欣拍拖,中間重要有其他野,先去得到拍拖果步。

例如19 才子的 post :「 單方面貼張selfie, 就令到好多人變成 … Kevin Spacey」。Kevin Spacey 比警察查,唔可以話因為有人單方面貼張selfie就導致Kevin Spacey乜乜乜咁簡單。中間重其他野,先去得到Kevin Spacey乜乜乜果步。

1a3. Weak analogy,中文是 “弱類比”。 簡單講,就係用不恰當的類比推論。
普通例子:慈母話好似猶太人咁被迫害喎。

例如19 才子的 post :「 如果戴耀廷比女學生話胸襲」。 點解呢個比喻不當? 如果,小學生比老師捉到出貓,小學生就反問老師「如果班長出貓你會唔會捉佢吖!」 如果你係老師你會點樣搭小學生?通常我哋大人會答《而家係你出貓唔係人哋》、《唔好拎埋其他人嚟講》、《我都見唔到佢又出貓,唔好亂話其他人》、或《我見到邊個出貓都會捉》之類。我哋大人都會覺得小學生用【如果係班長】呢個比喻不當啦。即是19 才子隨手搵個老師黎做比喻不當囉。

又例如,之前店長貓事件,人稱嘅屈文妓出文話,如果嗰個女人唔係大陸女人會唔會搞到咁大件事乜乜乜。都係有 “弱類比” 呢個語言偽術,因為根本就無得咁樣類比,事實嗰個係大陸落嚟探親嘅女人就係大陸黎嘅女人,無得話如果唔係。

佢嘅語言偽術太多,以下都有講,但我反而想講反社會行為呢一點:
1b. 反社會行為 Anti-social behaviour:19 才子果啲 posts 嘅 intention 唔知,但就行為就反社會。社會對性或性侵呢個話題已經好顧忌,佢重要講啲咁嘢,會鼓勵社會對女性被侵犯就係女性自己嘅問題的錯誤觀念,幫忙打壓女性。當社會上對性或性侵有曲解,受害人因為擔心社會輿論壓力,唔夠膽出聲,受到侵犯之後只好帶著 shame, guilt, fear, self-blame 等 negative emotions默默承受壓抑在心中。而因為無人會夠膽企出黎,令到壞人更加肆無忌憚,為所欲為。 所以19才子做嘅係反社會嘅行為。

1c. 而19 才子話黃婆婆當年摸佢塊面,如果佢覺得受到性騷擾,聽 777 勸告,勇敢企出黎,去求助或報警。男士都可以係性侵受害人,女性都可以是施暴者。而且佢提到 ”霸權” ,就如佛洛依德講嘅 sex 及aggression 係 basic drive,性騷擾或侵犯,不一定純粹因為性需要,有時是權力的表現。例如之前新聞報導消防涉及性的欺凌行為,唔代表欺凌同僚的消防是男同性戀者,欺凌可以是權力的表現。

1d.本來 19 才子講咩關我咩事,但我認為身為一個公眾人物,應該要知道一言一行可以影響深遠, 好似我以上咁講,所以我將佢嘅語言偽術,同埋反社會行為講出嚟,希望大家真係有critical thinking 唔好咁容易比人誤導,用地道嘅語言講,即係唔好咁容易比人耍。當然我最希望嘅,係唔會再有任何人或動物受到任何身體或心靈受害。

2. 解讀 “疑似前港姐前男友” 嘅語言偽術。
2a. Attacking the motive,中文是 “攻擊動機”。 呢個就係字面嘅意思,即是攻擊別人講嗰啲說話或者行為嘅動機。
普通例子:A話「唔同意浪費納稅人嘅錢起三跑起高鐵起大橋」。B話「呢個人相當有嫌疑,想令到香港經濟退步」,懷疑A講嘅嘢嘅動機,而唔係了解A有無論據,或者論據係唔係合理。

例如 “疑似前港姐前男友” 話女運動員的 #metoo post 是「成篇文係雕琢而成嘅商業文。。。 我睇嗰位運動員一啲表達方式,覺得好似有啲鋪排」。佢針對嘅係女運動員嘅寫作技巧同背後動機,而唔係別人嘅理據或者論點。好彩我啲中文咁差,如果唔係,我擔心佢話我篇文雕琢而成,而唔係睇我嘅論據有幾好。

2b. Bandwagon argument,中文是 “訴諸群眾”。即是,用 “大部分人都係咁做”,黎到解釋點解有人會咁樣做。 用人類嘅語言講,即是簡單推論別人係跟風,而唔係睇做嗰個人嘅論據及論點。
普遍例子:「而家咁多學童自殺,咪有樣學樣囉」。但除咗參考其他學童自殺之外,自殺仲有好多其他心理、neurological、家庭環境、學校及社會原因令到學童自殺,不可以就咁簡單推論學童因為有樣學樣先至去自殺。

例如 “疑似前港姐前男友” 話「喺美國依家呢個 #metoo,人人都用,去到一個位我分唔到乜嘢真係有勇氣走出嚟,乜嘢係食住個勢上其他鋪排」。 第一,在 research 大忌就係話 “人人”,因為無數據見到 “人人”,以下講 hasty generalisation。 第二,「食住個勢上其他鋪排」 就係話人跟風, 而唔係睇人哋嘅論據。其實19才子都有用呢種語言偽術。

2c. Hasty generalisation。中文 “輕率概化”。即是,只憑不足夠或者不具代表性嘅實例或sample,就推論出歸納性嘅結論。 用人嘅說話表達,即是睇到有啲人係咁,就歸納為人人都係咁。
普遍例子:遇到幾個不忠嘅男伴,就推論為個個男人都係不忠。 雖然有男人不忠,但唔係個個男人都係不中。
普遍例子2:有香港嘅女仔想嫁有錢人唔洗返工,但唔係個個香港女仔嘅目標係嫁有錢人之後唔洗返工。

例如 “疑似前港姐前男友” 話「喺美國依家呢個 #metoo,人人都用」,邊有數據顯示人人都用? 上文19 才子就話「個個」,邊有數據顯示個個?

3. Projection。中文是 “投射”。即是,自己係咁就會用返同一個角度以為人哋都係咁。19才子同 “疑似前港姐前男友” 有個共通點,就係懷疑別人寫 #metoo 是因為想出位,唔通係 projection? 佢兩個嘅動機就唔知啦,但係佢哋兩個嘅言論就有反社會嘅行為。

4. 盲粉
4a. 做得盲粉當然要忠誠同埋盲目。盲粉通常有以下兩個特質:
4a1. Belief perseverance,中文是 “信念堅持”。即是,信咗一樣嘢或一個人之後,就算以後有啲乜嘢理據顯示嗰樣嘢係錯,或者唔值得信都好,仍然唔會理,堅持相信之前相信嘅嘢或人。
例如19 才子寫啲反社會行為嘅嘢,有盲粉覺得「頭腦簡單嘅人係睇唔明」佢寫嘅野。不過我都係講多無謂,當盲分信咗偶像,佢就係信。你講乜都無用,你顯示幾多理據比佢睇都無用,佢都會覺得你頭腦簡單,或者老屈佢偶像。例如欣宜扮白雪公主比人笑唔靚事件,19 才子 challenge 固有思想,話公主一定要靚架咩。盲粉覺得自己偶像又記一功,我就話,我同意公主唔一定要靚,因為我都反對只針對女性樣貌而忽略其他特質。但白雪公主就一定要係靚,因為個故事已經講左白雪公主係靚。如果19 才子認為欣宜是靚係ok嘅,因為美醜是主觀亦受社教化影響。但認為白雪公主唔一定要靚就唔ok,一係就改故事囉。

4a2. Confirmation bias,中文是 “確認偏差”。即是, 選擇性記住,去 search 一啲有利嘅資料作為理據,忽略不利或者同自己觀點矛盾嘅資訊,黎到支持自己已有嘅觀點。
用返剛剛嘅例子,忽略其他反駁19才子的資料,但去 search 或一見到支持佢嘅說話「頭腦簡單嘅人係睇唔明」 就當係金石良言,非常啱聽。

4b. 國王的新衣:「頭腦簡單嘅人係睇唔明」 呢句說話嘅意思,即係話如果你唔認同19才子就代表你愚蠢。我就覺得比語言偽術耍嘅人先至係無知。

4c. 法庭判左有罪或者無罪,都唔代表嗰個人有做或無做嗰件事。例如有樣野叫冤獄。相反,亦都有做咗犯法嘅事但無被捉到去定罪,例如紅燈過馬路,坐小巴唔扣安全帶,侵犯知識版權等等。雖然無捉到,但唔代表嗰個人無做過。

4d. 有報警或者無報警,都唔代表嗰件事有發生定無發生。例如有樣野叫報假案。相反,有啲人懷疑被人偷左手提電話都無去報警。咁無去報警,又代唔代表嗰個人無被偷手提電話呢?

4e. 有人質疑女運動員點解當時唔講,點解唔開名等等。。。大家睇咁多無質素嘅 posts,不如睇下專業人士點講啦。
https://www.thestandnews.com/…/q-a-%E5%91%82%E9%BA%97%E7%9…/

5. 估唔到我講邊個唔緊要,我時時話針對嘅唔應該係人,針對嘅係言論同埋行為。因為沒有他總會有別人,針對呢個人又會有其他人。而且,言論同埋行為是可以改善嘅,改善左咪ok囉,針對個人無意思。所以針對嘅係應該係言論同埋行為。

即是 777 話嚴肅處理女運動員嘅事, 唔通呢句說話因為係 777 講就等如嚴肅處理係錯咩?嚴肅處理係正確架嘛,所以針對嘅應該係言論同行為,而唔係一個人。當然佢會唔會嚴肅處理同埋有幾嚴肅就唔知喇。

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s