Relationship

高踭鞋的魅力

研究發現著高踭鞋可以令到女性更加吸引。

 

研究是這樣的,研究員找來一位19歲的少女穿著黑色褸,白色上衣及黑色半截裙,不過少女會分別穿平底鞋,有踭鞋及高踭鞋,在街上截停男途人叫他們幫手填問卷。

研究結果:

穿平底鞋的時候:只有 47% 的男性會願意停低幫手做問卷。

穿有踭鞋的時候:有 63% 的男性會願意停低做問卷。

而穿高踭鞋的時候:竟然有 83% 的男性會願意停低做問卷。

這顯示,當女性穿高踭鞋的時候,比較容易吸引男性停低幫手。

 

研究員再做第二個研究,今次同第一個研究差不多,但找來四位19歲的少女,他們身高,體重,鞋嘅size 都差不多,他們四位都著住同第一個研究一模一樣的衣服,亦會穿上三個不同高度的高踭鞋,他們四位分別在四個不同的地方找男士及女士做問卷。

找女性做問卷的研究結果:

穿平底鞋的時候:有 32% 的女性會願意停低幫手做問卷。

穿有踭鞋的時候:有 37% 的女性會願意停低做問卷。

穿高踭鞋的時候:有 30% 的女性會願意停低做問卷。

這個結果很有趣,當少女穿不同高度的高踭鞋的時候,願意停低做問卷的女性的 percentage 差不多,而當少女穿高踭鞋的時候,反而最少女性願意幫手做問卷。唔通女性不是太喜歡其他女士穿高踭鞋?

 

找男士做問卷的研究結果,與找女性做問卷的研究結果,有非常之大的分別。

穿平底鞋的時候:只有 42% 的男性會願意停低幫手做問卷。

穿有踭鞋的時候:有 60% 的男性會願意停低做問卷。

而穿高踭鞋的時候:竟然有 82% 的男性會願意停低做問卷。

這個找男性做問卷的研究結果,同第一個研究結果差不多,睇黎男性真係幾鍾意幫著高踭鞋的女士做問卷喎。

 

再做第三個研究,今次那四位19歲的少女,當然是著同一樣的衫及鞋。不過今次他們不是叫人幫手填問卷,而是行行下跌了一隻手套,看看有沒有人幫手執。

女路人的研究結果:

穿平底鞋的時候:有 42% 的女路人會幫手執隻手套比返個少女。

穿有踭鞋的時候:有 50% 的女路人會。

穿高踭鞋的時候:有 52% 的女會路人。

 

男路人又會否幫手執呢?

穿平底鞋的時候:有 62% 的男路人會幫手執隻手套比返個少女。

穿有踭鞋的時候:有 78% 的男路人會。

而穿高踭鞋的時候:竟然有 93% 的男路人會。

著高踭鞋的時候跌手套,竟然有接近100% 的男路人會幫手。唔通男性比女性更加喜歡幫助別人?

 

為了排除男性比女性更加樂於助人的可能,研究員再做第四個研究。今次,在第一個研究幫手的少女,被安排到三間不同的酒吧。而她每次也是穿著同一樣的半截裙及緊身上衣,當然同之前的研究一樣,會分別穿上平底鞋,有踭鞋及高踭鞋。研究員叫她單獨坐在吧檯,並叫她翹腳坐讓男性更加清楚看到她著什麼鞋,研究員則坐在一邊計時。

研究結果非常有趣:

穿平底鞋的時候:14 分鐘有男性走過去搭訕。

穿有踭鞋的時候:11分鐘會男性 走過去搭訕。

而穿高踭鞋的時候:竟然7分鐘便有男性走過去搭訕。

 

總括這四個研究的結果,女性著高踭鞋更能夠吸引男性注意,願意幫手的 percentage 極高,及好快便會行過去搭訕。

 

為什麼著高踭鞋比較吸引?因為高踭鞋個踭高的關係,女士行路時自然會挺胸收腹,亦會行得比較婀娜多姿,所以比較著平底鞋的時侯,更能夠吸引男士注意。而且著高踭鞋的時候,對腳睇落去會比較修長,同埋隻腳會細d,望落去成個人比較斯文同埋纖瘦d,所以男性好快會行過去搭訕囉。當然我不認為女性要以吸引男性為首要任務,但如果單身了很久,或好想吸引你心儀的男性,不妨試試改著高踭鞋啦。

資料來源:

https://www.psychologytoday.com/blog/all-about-sex/201612/the-uncanny-psychology-high-heels

 

Advertisements
Love · Movies · Social Psychology

傲慢與偏見

在英國讀書真的可以比較專心,因為好多時都好悶沒甚麼可做。我通常也留在自己房做功課,有時行行附近博物館,星期六或日去超級市場買食物及日常用品,去圖書館借 DVD 睇。

“Becoming Jane” 是我的十大喜歡電影之一。這套電影關於非常出名的英國女作家 Jane Austen。當時社會風氣傳統,不認同女性擁有自己事業,認為女性都要結婚,而且父母的積蓄全部歸於兒子,如果女性沒有結婚,便無人無物了。很多人也受社教化 (socialisation) 影響,以為結婚就是女性的唯一出路,沒有理會甚麼愛情,最緊要嫁個有錢人,讓其家人也衣食無憂,之後專心躲在大宅與其他女性圍埋一個墟。Mrs Austen 在電影裡說:Affection is desirableMoney is absolutely indispensable! 但 Jane Austen 有 independent thinking,即使求婚者非常有錢,絕對有能力令她及家人一世豐衣足食,但她寧願要一個懂得欣賞及尊重她寫作的人,堅拒嫁給不喜歡的人。她打破當時社會禁忌,最後選擇不結婚而靠寫作為生。

這套電影還有另外一個主題,把 Jane Austen 鮮為人知,亦不能夠開花結果的愛情故事帶上銀幕。Thomas Lefroy 當時將會成為一個前途無可限量的 lawyer。他兩個最初相識的時候,Lefroy 在倫敦名校讀書法律,成績好之餘,運動又叻,人又靚仔,性格又開朗,在大城市見多識廣,所以他對在鄉郊出生及長大的 Austen 的態度傲慢又串嘴,留給 Austen 的第一印象非常差,Austen 對他當然有偏見啦。之後兩個人時時針鋒相對,你串我我串你,在鬥嘴同時,兩人竟然漸漸喜歡對方。他們鬥嘴卻鬥出愛情,就像是我之前說的心理學研究及理論 misattribution of arousal 。

故事峰迴路轉,但我不在這兒講太多劇情了,大家可以用自己方式睇返這套電影。Lefroy 後來成為愛爾蘭首席大法官。Austen 成為出色的作家,以兩人的愛情故事作藍本,改編成為十分著名的小說 “傲慢與偏見” (Pride and Prejudice)。Austen 與 Lefroy 未能如小說般大團圓令我有點感慨,世事往往未能盡如人意。但如果他倆最終在一起,世人便不可能讀到 Austen 的小說,Lefroy 亦不可能攀上事業的高峰。看看這電影便知道我說甚麼了。

 

Freud · Personality · Stress

關於 Zeigarnik Effect 一問

聽眾來信問及關於 Zeigarnik Effect, 以下是問題及答案:

1) 問題:咁多成年人鐘意買/收藏玩具,仲要整個柜展示,又係唔係因為未完成的夢 (小時候買不到!)。
答案: 有機會係。但亦有機會主因唔係『Zeigarnik Effect 未完成的夢』。而係因為內心不安全感、冇自信,所以要搵啲嘢嚟填補心靈上面嘅欠缺,所以儲儲埋埋好多嘢,例如玩具。

例如集郵,就未必因為『Zeigarnik Effect 未完成的夢』。我覺得因為以前有一封信,無疾而終消失咗,而令到今時今日要集郵嘅機會比較低。

講開集郵,我諗到另外嘅原因,佛洛伊德的『自我防衛機制』入面嘅其中一種:『反作用 reaction formation』。因為內心接受唔到自己係一個咁樣嘅人,所以做出黎行為就同內心諗嘅相反。 例如,接受唔到自己係同性戀,所以行為上,就同好多異性發生關係,跟住仲要影相集郵,黎到證明比自己睇,自己咁多異性伴侶,當然係鍾意異性,而唔係鍾意同性啦。

佛洛伊德嘅『自我防衛機制』另外一種叫做:『補償compensation』。例如,發現自己爸爸原來係同性戀者,接受唔到事實,自己就同好多異性發生關係,黎到補償爸爸唔鍾意女性,再收集埋與異性影埋床照,集郵,以補償自己內心的缺失。

『情況如有雷同,實屬巧合』

其實,適當程度嘅儲野,當興趣玩下,儲少少,無可厚非。只要唔影響其他人、自己的生活、工作、人際關係、人身安全、財政、負面後果比較細等等…,冇乜太大所謂。

但如果內心空虛,無論點樣儲,都唔會儲到可以解決內心嘅空虛、欠缺,而不安全感仍然繼續,所以 一味儲嘢,儲極都唔夠。

咁就有機會成為儲物狂,hoarding。根據 DSM 5,是『OCD 強迫症』嘅一種。

 

2) 但点解我又冇呢樣習慣?好多成年女子又冇?

答案:所謂,一樣米養百樣人,心理學叫做 『individual differences』,每個人都有自己嘅性格特質,有唔同的心理因素,而且每個人都有唔同嘅問題,或者問題唔係喺儲野,而係喺其他方面表現出來都唔出奇。在世上,是無人無問題的。

相反,有時同一個心理原因,都會有唔同嘅『manifestation 表徵』,即是表面嘅行為唔同。例如,見到陌生人,或者去到陌生環境,而內心出現不安。有啲人會好靜,睇落佢唔係咁能夠適應新環境。相反,另外有啲人,好似開籠雀咁好多嘢講,仲要好似花蝴蝶咁成場周圍飛,表面睇落呢種人應該唔怕醜,非常能夠適應環境啦,但係啱啱相反,呢種出奇地多嘢講及離奇地周圍 socialise 嘅表徵,往往就係內心不安嘅表現。雖然大家內心也是對陌生產生不安,但表徵就有好明顯分別。另外,後者通常自信比較低,用嘅『自我防衛機制』都比較多,亦唔係咁喜歡自己,唔係咁認識自己,或唔係咁能夠承認自己的問題。如果唔係,都唔洗內心感覺同表面行為差咁遠啦,因為佢地自己不能承受自己內心的不安嘛。

 

3) 又或者小時候已經有那種玩具,但不間斷咁買?

答案:小朋友腦部發展的時候,會比較想有『stimulation 刺激』, 佢哋都有一個傾向,就係喜歡重複鍾意嘅嘢。例如,聽兒歌要聽好多次都唔厭,睇迪士尼卡通睇好多次都唔厭。所以兒歌通常都係節奏簡單, 而且重複又重複。

Social Psychology

點解明明比人搵笨,仍然堅持相信呢?

點解明明比人搵笨,但仍然堅持相信呢?

真心佩服拍檔 Maggie,可以把咁複雜嘅心理學理論,非常簡單直接咁樣講比大家知。歡迎大家 Like 及 Share!

Leon Festinger 非常出名,係 Father of Social Psychology『社會心理學之父』!佢講嘅 cognitive dissonance 『認知不協調』及 cognitive consonance 『認知協調』可以解釋到點解比人搵笨仍然會死撐。

當人發現自己支持嗰件事係唔合理,就會出現『認知不協調』,即是覺得自己點會支持一啲咁樣嘅事情㗎,咁樣內心就會出現 tension。有咩辦法減低內心嘅 tension? 就係死撐,或者用心理學名詞叫做『合理化』。當『合理化』咗嗰件事,內心就會出現『認知協調』,協調咗就冇 tension 啦。

另外有一個研究係咁樣嘅,研究員搵黎一班實驗參加者,將佢哋隨機分開為兩組。兩組實驗參加者同樣要做一啲非常之悶嘅 task。但係A組有少少補償,B組就係免費勞工。

你哋估下A組定B組覺得個task冇咁悶?明白咗『認知不協調』嘅你哋,一定知道答案係B組。

因為已經無啦啦被老點做左免費勞工,如果仲要做一啲好悶嘅 task,咁咪覺得被人終極搵笨囉。覺得自己蠢左,好『認知不協調』啫,唔係咁多人能夠接受自己蠢咗比人搵笨㗎嘛。所以B組嗰班免費勞工,會覺得個task都唔係咁悶啫。因為被老點之後,如果個 task 係 meaningful,都感覺無咁蝕底吖,咁就係以『認知協調』去減低內心比人搵笨的 tension。

除左 Maggie 在 video 講嘅信『世界末日』、或者呢期好熱門嘅話題 #動物傳心術 ,『認知不協調』都可以解釋點解伴侶出軌,仍然死撐話伴侶係好愛自己嘅,只係第三者衰啫。因為承認伴侶唔愛自己的話,即係自己揀錯人、或者自己唔夠第三者好,就會出現『認知不協調』。因為不能相信自己咁笨揀錯人,更不能接受第三者比自己好啦。為咗減低呢D『認知不協調』而帶來的內心 tension,就把原因賴落第三者到,即係死撐唔係自己嘅問題,自己冇揀錯人,只不過係第三者衰之嘛。當賴左落第三者到,自己就無問題啦,咁樣就令到自己可以『認知協調』啦。

覺得好複雜呢~~~ 所以好多人扮有讀心理學,或者報讀一D非正統課程,又話自己係讀心理學嘅,等你出現『認知協調』,你就會以為佢地好猛料囉。

睇下 Maggie 嘅 video 啦:

https://www.youtube.com/watch?v=nhpHvbH17ok&feature=share

 

Cognitive Psychology

點解初戀特別令人懷念?

初戀令人懷念,係因為 Zeigarnik Effect。

簡單講:Zeigarnik Effect 意思係,人有一個傾向,會記得未完成嘅工作,多過已經完成哂嘅工作。後來,Zeigarnik Effect 被用來解釋點解初戀、或者無疾而終嘅戀情,咁令人懷念。

詳細講:當 Bluma Zeigarnik 還是 Kurt Lewin 的學生時 (By the way, Kurt Lewin 係社會心理學家,亦係完形心理學家 (Gestalt psychologist),非常 open-minded,係當時極少數肯收女性入自己門下嘅學者。),Zeigarnik, Lewin 及 lab 的其他同學,好多時都會去大學附近一間 cafe 一齊 hea 下。佢哋發現 cafe 個侍應,當佢哋埋單比錢時,完全記得每一個人的 order 而收錢。咁都唔係咁出奇啫,只不過係個侍應記性好之嘛。但係好有趣地,比完錢,佢哋再問番個侍應頭先每一個人嘅 order,個侍應會即刻唔記得哂。即係,一直未收錢都好記得 order,一收咗錢就乜都唔記得哂。

Zeigarnik 就呢一個咁有趣嘅現象,作出一系列嘅研究。例如,佢把實驗參加者分為兩組,分別叫佢哋做一系列相同嘅 tasks,比如砌砌圖、砌其他野等等。但其中一組做到一半嘅時候,被研究員打斷無得繼續;另外一組就可以完成 tasks。跟住佢就訪問返兩組實驗參加者。研究發現,被打斷無得完成嗰一組嘅實驗參加者,會比起完成哂嗰組嘅實驗參加者,更加記得自己當時做緊個咩 task、點樣做、程序、做到邊度等等。呢一個現像,被稱為 Zeigarnik Effect。

點解人會出現 Zeigarnik Effect 呢?可以用返 Zeigarnik 嘅師傅 Lewin 嘅強項『完形心理學』 (Gestalt psychology) 去解釋。完形心理學的精髓是『the whole is greater than the sum of its parts』。人腦嘅運作係傾向想睇整體,如果畫一個未埋口的圈,嚴格嚟講不應該叫做圈,都無埋口,但人腦會傾向睇到果個係一個圈。又或者,有三條線,A線是水平線,上方有B線是由左下斜向右上,旁邊有C線是由左上斜向右下,而呢三條線都冇黐埋一齊,嚴格嚟講唔係一個三角形,但人會傾向睇到是一個三角形。就係呢一個要d野『完形』嘅心態,令到我哋遇到未完成嘅事情時,內心就出現 tension,一味心掛掛,好想要完成佢,一完成咗就唔記得囉。就是 Zeigarnik Effect。

Image result for Gestalt psychology
Image: Wikipedia

後來,Zeigarnik Effect 被 apply 到唔同情況,例如頭先講過,用嚟解釋點解初戀、或無疾而終嘅戀愛咁令人懷念,係因為都未、或者無,經歷戀愛中的『生老病死』就無咗啦。

另外,可以解釋娘娘用嚟收兵嘅方法,娘娘一定唔會比兵仔『完成』喇,同埋娘娘有時回答有時唔回答,兵仔見到雙藍色 tick 都唔答,就會好掛住娘娘硬係有啲嘢未答佢,咁兵仔就好掛住娘娘。

亦可解釋點解人咁鍾意追電視劇,因為之前嗰晚嘅劇情未完,剛到 climax 就夠鐘,所以個心好掛住,今晚要趕住返屋企追埋套劇。

講多一個,Zeigarnik Effect亦可解釋 procrastination (即是死拖唔肯做功課) 點解令人有咁大壓力,係因為有功課未做,雖然個人去咗玩,但個心一味心掛掛有野未做。

Cognitive Psychology

情緒與身體知覺

有無試過當你覺得憂傷的時候,會感到手腳冰冷?相反,覺得欣喜的時候,個心會覺得好溫暖? 關於情緒與身體知覺 (physical sensations) 的研究,叫實驗參加者根據自己情緒而感受身體知覺,再在人形公仔上填色。 黃色及紅色顯示身體那個部分感覺最強烈,藍色表示最冇感覺。而黃色及藍色在光譜的兩極。 圖中的 happiness 及 depression 的身體知覺有很大對比。Happiness 充滿溫暖的黃色及紅色,相反,depression 充滿冰冷的藍色及深藍色。 這研究結果顯示,人在不同情緒,會感到不同的身體知覺。 以下 link 參考文章及圖片: http://m.huffpost.com/uk/entry/4549145

Cognitive Psychology · Social Psychology

學識運用人的五感,助你心想事成

震驚 14 億人,只要學識運用人的五感,你就可以心想事成啦。

1. 溫度:你估下,如果你約心儀對象出街, 到底應該同佢去咖啡店飲杯熱咖啡,定係去酒吧飲杯冰凍啤酒呢?
研究發現,當實驗參加者拎住一杯熱咖啡的時候,他們會評論別人為慷慨、大方、有愛心、心地善良等等, 即是認為對方有一些令人覺得溫暖及正面的特質。相反當他們拎住一杯冰凍咖啡的時候,他們則評論別人為性格煩躁、容易不安、自私、反社會、不理人感受等等,即是認為對方有一些令人覺得冷酷及負面的特質。所以,如果你約心儀對象出街,留下第一印象非常重要,最好帶佢去咖啡店飲一杯熱飲,熱咖啡、熱茶、或熱朱古力都得,咁就可以讓對方覺得你溫暖及擁有 正面特質。

2. 質地:你估下,如果你要同人傾買賣,你應該坐喺乜嘢質地嘅凳, 同埋安排對方坐喺乜嘢質地嘅凳呢?
關於 negotiation 的研究發現,當實驗參加者坐在硬凳,在 negotiation 時會比較硬淨、堅持。 相反,坐在軟的凳上的實驗參加者則比較容易心軟。所以, 如果你要同人 negotiate 的時候,你就坐一張硬凳,例如木櫈;讓對方坐一張軟的凳 ,例如梳化。 咁樣,對方就會好容易心軟,依你計劃行事啦。

3. 顏色:雖然以下呢條問題係問女士嘅,不過男士都要注意研究結果。女士們如果你約心儀對象出街你會著甚麼顏色的上衣呢?
研究是這樣的,研究員叫一位女協助員拍四張一模一樣的照片, 唯一不同之處,她分別著紅色、藍色、綠色、及灰色的上衣。跟著,研究員把那四張照片分別讓不同的男性實驗參加者看
並評分。結果顯示,穿『紅色上衣那位女性』最性感及最具吸引力,他們亦最想約這位紅衣女郎出街。但其實四幅照片都是同一個女協助員,即是話,穿不同顏色的上衣能令她吸引力改變,而當她穿紅色上衣時,令她最具吸引力。
但有一點要注意,男性實驗參加者沒有覺得那位紅衣女郎最有智慧、最友善、或最平易近人,只是覺得她最誘人。
所以女士們,你想給人甚麼印象便要穿什麼顏色的衫了。而男士看了這個研究,便知道自己只是被顏色影響,才感覺那些女性有什麼特質,而她們未必真的有那個特質。

4. 光線:你估下,什麼光線可以增加創意,光管、還是燈膽? 同埋你點樣擺個盒又可以影響你的創意呢?
研究顯示,用燈膽比起用光管,會令實驗參加者更有創意。這可以解釋為,我們看到燈膽會聯想到創意,所以當燈膽著了,寓意有 idea,影響實驗參加者在那一刻變得真的有創意。
另一個有關創意的研究是這樣的,實驗參加者被分為兩組,第一組被安排坐在一個大箱入面,第二組被安排坐在箱的出面,而兩組人也要用創意去解決問題。結果顯示,坐在箱出面的那一組, 比起坐在箱入面的那一組,更具創意。即是話,坐在箱出面的那一組,寓意『think out of the box』影響他們,令他們更有創意。

5. 氣味:你估下,什麼氣味可以令你做運動更加起勁?另外, 有什麼氣味可以提高你的工作效率?
研究顯示,運動員在充滿 peppermint (薄荷) 的環境做運動,比起在沒有添加氣味的環境,可以令他們做運動做得更加起勁。另外,peppermint 亦可以令人覺得做運動沒有那麼辛苦。但我們未必可以在 gym room 噴 peppermint 香水嘛,那可以試試做運動前 chew 一塊 peppermint 香口膠。
另外,cinnamon (肉桂) 的氣味有助提升注意力及記憶,所以我們可以試試在工作間或者溫習室, 用 cinnamon 氣味以提高工作效率。

Link 參考:
https://m.psychologytoday.com/ blog/the-squeaky-wheel/201405/ how-mastering-all-5-senses- can-get-you-what-you-want