Holistic development

9個習慣改善精神健康

日常生活習慣原來對我哋嘅精神健康都會有影響。試試改變以下9個生活習慣,去改善精神健康。

1. 行路姿勢:我成日都話我哋嘅身心係互動嘅,如果你行路嘅時候寒哂背,頭耷耷,會影響心情,諗嘢都負面啲。相反,行路岳高頭,挺起胸膛,昂然闊步,會令到心情愉快啲,個人有自信啲,諗嘢都正面啲。

2. 用心感受:智能電話有相機真係好方便,食嘢嘅時候都要相機先食,美食當前,唔影低佢咪好快唔記得食過咩囉。 去遊山玩水,風景美麗,唔影低佢咪好快唔記得囉。好難得同bb豬去玩,枱又影,碗又影,花草當然要影,階磚唔係唔影下化,唔影咪好快唔記得囉。但係,研究發現,係又影唔係又影,反而會更容易唔記得。因為影相的時候精神專注在影相,而無 pay attention 去記住果樣野。當我地覺得某樣野值得記念,其實唔單只係果一樣野,周圍環境人與事及氣氛,都會幫助令到果樣野更加美麗而值得記念。但諗住影底咪記得囉的心態,會令我地無留意周遭協助令到果樣野美麗嘅野,所以我地記得嘅係張相,唔係當時嘅果樣野。相反,如果真係想記住一啲美好時光,美麗事物,最好嘅方法,放底個電話,一事一物用心感受。

3. 做運動:活躍做運動,尤其做帶氧運動,或者同一啲朋友一齊玩嘅運動,例如打波、行山,可以減低患上抑鬱症嘅機會。而不活躍做運動嘅人,會比較容易有抑鬱嘅症狀。即使城市人生活繁忙,都可以從生活中做運動, 例如搭地鐵,行商場嘅時候,或者公司環境許可的話 (比如在學校環境返工),都可以選擇行樓梯,而唔係搭電梯。

4. 停止拖延:有冇試過因為唔想做某些工作,就會拖延到 deadline 之前先做,希望盡量減低對住嗰份工作的時間,以為咁樣會令到自己好過啲?實際卻相反。因為在拖延的時間,內心一直會記住有工作未完成。(要睇睇我寫的 Zeigarnik Effect) 而每一次想起那份工作,除了厭惡,還會覺得緊張,一味心掛掛。所以,如果嗰份工作一定要做嘅話,試試放低情緒,唔好理鍾意定唔鍾意,快快手完成佢,咁就真係可以對住嗰份工作短啲時間之餘,又唔會有拖延的焦慮。

5. 放低一段毒害你嘅關係:如果你嘅伴侶事事挑剔,覺得你呢樣唔啱嗰樣唔好,唔會欣賞你,亦唔識珍惜你,你同佢一齊變得好無自尊。想想,如果你見到親人或好朋友在一段關係入面,心靈或者身體受傷害,你會比乜嘢意見佢?你唔會希望佢不斷接受身心靈的傷害嘛。

6. 充足睡眠:睡眠不足,不但影響身體健康,認知功能,亦會影響情緒。想要身體健康及精神健康早啲瞓啦。

7. 要有私人時間:城市人時間好似唔係自己咁嘅,返工有同事,放工搵朋友,返到屋企有父母、伴侶、仔女。。。完全無 me-time。抽啲時間出嚟靜靜地與自己相處,一個做一啲輕鬆及有興趣嘅嘢,平靜心靈減低焦慮或抑鬱嘅機會。

8. 減低使用電子屏幕產品:例如,電腦、手提電話,用得多影響我哋身體健康,例如頸痛背脊痛,大家都理解,原來亦會影響我哋認知能力及情緒。 可參考衛生署家庭健康服務,兒童與電子熒幕產品:http://www.fhs.gov.hk/…/health_…/OMP_eNewsletter/screen.html
雖然內容計對兒童,但亦可 apply 到成人。

9. 減低 multitasking:打邊爐嘅時候,筷子夾住肥牛擺落個鍋度,個口不斷同其他人傾計,眼就望住出面睇下自助吧加咗菜未,同時眼尾就望住啲細路,耳仔聽到電話收到訊息,另外嗰隻手就拎電話,睇返肥牛得味嘅同時,眼尾望到侍應行過大叫佢加湯。。。好多人會以為能夠 multitasking 等於嗰個人醒目。但係研究發現 multitasking 只會削弱你嘅認知功能。長時間 multitasking 會減低你嘅高階思維能力,例如專注力、分析力、組織能力、計劃能力,亦會削弱深入思考嘅能力。Multitasking 亦會提高你嘅壓力水平。例如唱錢黨,問你呢樣果樣,要你收錢,又趕時間催你唱錢,跟住又話唔要邊件貨,之後又話加返乜嘢,令到條數好亂,再話趕時間催你快快快啲唱錢比佢走。或者聲東擊西嘅手法,就係專登做到同一時間好多野發生,令到你要 multitasking,當你 multitasking 嘅時候,就削弱咗你嘅認知功能,令到你混亂,影響記憶唔記得佢比咗錢你未,影響注意力冇留意你唱咗幾多錢比佢。所謂食不言寢不語,就係叫你要專注,唔好 multitasking。

Advertisements
Freud

Psychosexual stages of development

昨天是 11 月 11 號 Remembrance Day,睇到以下 post 嗰句「那些口腔期國家」真係笑左。不如等我講下咩叫做口腔期啦。

https://www.facebook.com/readbeforeuspeak/photos/a.1497734167145399.1073741833.1490131274572355/1937543099831168/?type=3&theater

 

根據 Sigmund Freud 佛洛伊德嘅 psychosexual stages of development,人類成長發展有以下5個階段:

  1. Oral stage 口腔期,大約由出世至2歲,呢個階段快感來自嘴部,即是bb仔鍾意食嘢,啜奶咀,令到佢哋覺得安慰,同埋有安全感。
  2. Anal stage 肛門期,大約由2歲至3歲,呢個階段快感來自肛門,因為呢個階段係 toilet training,小朋友學習忍住便便唔好賴,去到洗手間就要放鬆放便便出嚟啦。 通常大人會覺得早戒片嘅小朋友就係叻,而有啲幼稚園都唔介意收細仔,如果細仔已經戒片的話。即是,小朋友在呢個階段,要開始學習幾時忍耐,幾時可以放出嚟。
  3. Phallic stage 性器期,大約由3歲至6歲,呢個階段嘅快感就係來自性器。有時見到小朋友會不自覺接觸自己身體嗰個部位。
  4. Latent stage 潛伏期,大約有6歲至12歲,呢個階段嘅小朋友學習有啲動作唔可以喺大庭廣眾嗰度做。而呢個階段係小學,小朋友面對好多功課,又要學習興趣班,建立學業以外的一啲技能,亦要學習社交、禮貌、禮儀等等。
  5. Genital stage 生殖期,由青春期開始直到老死都係呢個 stage 架啦。青春期開始 以後,快感制來自性關係。

 

而佛洛伊德話,人有機會 “kick住咗” 喺以上某個階段,叫做 fixation,即是一直停留喺嗰個階段,影響性格及做成心理疾病。

 

點解會 “kick住咗” 呢?

如果喺某個階段得唔到滿足,人就自然想停留喺嗰個階段,希望得到多啲滿足。或者,某個階段做得唔好,比大人鬧或比其他小朋友笑,人內心就出現 anxiety。例如遲戒片,或大個都賴尿,就會比大人鬧或比其他小朋友笑,內心出現不安。相反,在某階段過份得到滿足,人亦都想停留喺嗰個階段,因為樂而忘返。

 

“kick住咗” 喺唔同階段又會點呢?

  1. Oral stage 口腔期:鍾意咬野,例如咬筆,趙香口膠,食煙,食野,好多野講。性格一係好唔成熟,好易受騙,一係好鍾意操控別人。
  2. Anal stage 肛門期:如果在 toilet training 時,小朋友賴左,大人非常嚴厲管教甚至懲罰,小朋友嘅性格會變得過分拘謹,死板,固執,一成不變,甚至有潔癖。相反,如果大人過份放縱唔會管教,尤得小朋友賴咪賴囉,小朋友嘅性格會變得做事混亂,雜亂無章,粗心大意,冇規矩,目中無人。
  3. Phallic stage 性器期:男性會有戀母情意結 Oedipus Complex,而女性會有戀父情意結 Electra Complex。By the way, 有時無分得咁細,無論戀父定戀母,有時都會簡單叫 Oedipus Complex 就算。
  4. Latent stage 潛伏期:未能在性方面得到滿足。
  5. Genital stage 生殖期:冷感或唔得,同埋唔滿意與伴侶關係。

 

呢啲嘢,都係佛洛伊德講㗎咋,唔係我講㗎。

 

Relationship

高踭鞋的魅力

研究發現著高踭鞋可以令到女性更加吸引。

 

研究是這樣的,研究員找來一位19歲的少女穿著黑色褸,白色上衣及黑色半截裙,不過少女會分別穿平底鞋,有踭鞋及高踭鞋,在街上截停男途人叫他們幫手填問卷。

研究結果:

穿平底鞋的時候:只有 47% 的男性會願意停低幫手做問卷。

穿有踭鞋的時候:有 63% 的男性會願意停低做問卷。

而穿高踭鞋的時候:竟然有 83% 的男性會願意停低做問卷。

這顯示,當女性穿高踭鞋的時候,比較容易吸引男性停低幫手。

 

研究員再做第二個研究,今次同第一個研究差不多,但找來四位19歲的少女,他們身高,體重,鞋嘅size 都差不多,他們四位都著住同第一個研究一模一樣的衣服,亦會穿上三個不同高度的高踭鞋,他們四位分別在四個不同的地方找男士及女士做問卷。

找女性做問卷的研究結果:

穿平底鞋的時候:有 32% 的女性會願意停低幫手做問卷。

穿有踭鞋的時候:有 37% 的女性會願意停低做問卷。

穿高踭鞋的時候:有 30% 的女性會願意停低做問卷。

這個結果很有趣,當少女穿不同高度的高踭鞋的時候,願意停低做問卷的女性的 percentage 差不多,而當少女穿高踭鞋的時候,反而最少女性願意幫手做問卷。唔通女性不是太喜歡其他女士穿高踭鞋?

 

找男士做問卷的研究結果,與找女性做問卷的研究結果,有非常之大的分別。

穿平底鞋的時候:只有 42% 的男性會願意停低幫手做問卷。

穿有踭鞋的時候:有 60% 的男性會願意停低做問卷。

而穿高踭鞋的時候:竟然有 82% 的男性會願意停低做問卷。

這個找男性做問卷的研究結果,同第一個研究結果差不多,睇黎男性真係幾鍾意幫著高踭鞋的女士做問卷喎。

 

再做第三個研究,今次那四位19歲的少女,當然是著同一樣的衫及鞋。不過今次他們不是叫人幫手填問卷,而是行行下跌了一隻手套,看看有沒有人幫手執。

女路人的研究結果:

穿平底鞋的時候:有 42% 的女路人會幫手執隻手套比返個少女。

穿有踭鞋的時候:有 50% 的女路人會。

穿高踭鞋的時候:有 52% 的女會路人。

 

男路人又會否幫手執呢?

穿平底鞋的時候:有 62% 的男路人會幫手執隻手套比返個少女。

穿有踭鞋的時候:有 78% 的男路人會。

而穿高踭鞋的時候:竟然有 93% 的男路人會。

著高踭鞋的時候跌手套,竟然有接近100% 的男路人會幫手。唔通男性比女性更加喜歡幫助別人?

 

為了排除男性比女性更加樂於助人的可能,研究員再做第四個研究。今次,在第一個研究幫手的少女,被安排到三間不同的酒吧。而她每次也是穿著同一樣的半截裙及緊身上衣,當然同之前的研究一樣,會分別穿上平底鞋,有踭鞋及高踭鞋。研究員叫她單獨坐在吧檯,並叫她翹腳坐讓男性更加清楚看到她著什麼鞋,研究員則坐在一邊計時。

研究結果非常有趣:

穿平底鞋的時候:14 分鐘有男性走過去搭訕。

穿有踭鞋的時候:11分鐘會男性 走過去搭訕。

而穿高踭鞋的時候:竟然7分鐘便有男性走過去搭訕。

 

總括這四個研究的結果,女性著高踭鞋更能夠吸引男性注意,願意幫手的 percentage 極高,及好快便會行過去搭訕。

 

為什麼著高踭鞋比較吸引?因為高踭鞋個踭高的關係,女士行路時自然會挺胸收腹,亦會行得比較婀娜多姿,所以比較著平底鞋的時侯,更能夠吸引男士注意。而且著高踭鞋的時候,對腳睇落去會比較修長,同埋隻腳會細d,望落去成個人比較斯文同埋纖瘦d,所以男性好快會行過去搭訕囉。當然我不認為女性要以吸引男性為首要任務,但如果單身了很久,或好想吸引你心儀的男性,不妨試試改著高踭鞋啦。

資料來源:

https://www.psychologytoday.com/blog/all-about-sex/201612/the-uncanny-psychology-high-heels

 

Love · Movies · Social Psychology

傲慢與偏見

在英國讀書真的可以比較專心,因為好多時都好悶沒甚麼可做。我通常也留在自己房做功課,有時行行附近博物館,星期六或日去超級市場買食物及日常用品,去圖書館借 DVD 睇。

“Becoming Jane” 是我的十大喜歡電影之一。這套電影關於非常出名的英國女作家 Jane Austen。當時社會風氣傳統,不認同女性擁有自己事業,認為女性都要結婚,而且父母的積蓄全部歸於兒子,如果女性沒有結婚,便無人無物了。很多人也受社教化 (socialisation) 影響,以為結婚就是女性的唯一出路,沒有理會甚麼愛情,最緊要嫁個有錢人,讓其家人也衣食無憂,之後專心躲在大宅與其他女性圍埋一個墟。Mrs Austen 在電影裡說:Affection is desirableMoney is absolutely indispensable! 但 Jane Austen 有 independent thinking,即使求婚者非常有錢,絕對有能力令她及家人一世豐衣足食,但她寧願要一個懂得欣賞及尊重她寫作的人,堅拒嫁給不喜歡的人。她打破當時社會禁忌,最後選擇不結婚而靠寫作為生。

這套電影還有另外一個主題,把 Jane Austen 鮮為人知,亦不能夠開花結果的愛情故事帶上銀幕。Thomas Lefroy 當時將會成為一個前途無可限量的 lawyer。他兩個最初相識的時候,Lefroy 在倫敦名校讀書法律,成績好之餘,運動又叻,人又靚仔,性格又開朗,在大城市見多識廣,所以他對在鄉郊出生及長大的 Austen 的態度傲慢又串嘴,留給 Austen 的第一印象非常差,Austen 對他當然有偏見啦。之後兩個人時時針鋒相對,你串我我串你,在鬥嘴同時,兩人竟然漸漸喜歡對方。他們鬥嘴卻鬥出愛情,就像是我之前說的心理學研究及理論 misattribution of arousal 。

故事峰迴路轉,但我不在這兒講太多劇情了,大家可以用自己方式睇返這套電影。Lefroy 後來成為愛爾蘭首席大法官。Austen 成為出色的作家,以兩人的愛情故事作藍本,改編成為十分著名的小說 “傲慢與偏見” (Pride and Prejudice)。Austen 與 Lefroy 未能如小說般大團圓令我有點感慨,世事往往未能盡如人意。但如果他倆最終在一起,世人便不可能讀到 Austen 的小說,Lefroy 亦不可能攀上事業的高峰。看看這電影便知道我說甚麼了。

 

Freud · Personality · Stress

關於 Zeigarnik Effect 一問

聽眾來信問及關於 Zeigarnik Effect, 以下是問題及答案:

1) 問題:咁多成年人鐘意買/收藏玩具,仲要整個柜展示,又係唔係因為未完成的夢 (小時候買不到!)。
答案: 有機會係。但亦有機會主因唔係『Zeigarnik Effect 未完成的夢』。而係因為內心不安全感、冇自信,所以要搵啲嘢嚟填補心靈上面嘅欠缺,所以儲儲埋埋好多嘢,例如玩具。

例如集郵,就未必因為『Zeigarnik Effect 未完成的夢』。我覺得因為以前有一封信,無疾而終消失咗,而令到今時今日要集郵嘅機會比較低。

講開集郵,我諗到另外嘅原因,佛洛伊德的『自我防衛機制』入面嘅其中一種:『反作用 reaction formation』。因為內心接受唔到自己係一個咁樣嘅人,所以做出黎行為就同內心諗嘅相反。 例如,接受唔到自己係同性戀,所以行為上,就同好多異性發生關係,跟住仲要影相集郵,黎到證明比自己睇,自己咁多異性伴侶,當然係鍾意異性,而唔係鍾意同性啦。

佛洛伊德嘅『自我防衛機制』另外一種叫做:『補償compensation』。例如,發現自己爸爸原來係同性戀者,接受唔到事實,自己就同好多異性發生關係,黎到補償爸爸唔鍾意女性,再收集埋與異性影埋床照,集郵,以補償自己內心的缺失。

『情況如有雷同,實屬巧合』

其實,適當程度嘅儲野,當興趣玩下,儲少少,無可厚非。只要唔影響其他人、自己的生活、工作、人際關係、人身安全、財政、負面後果比較細等等…,冇乜太大所謂。

但如果內心空虛,無論點樣儲,都唔會儲到可以解決內心嘅空虛、欠缺,而不安全感仍然繼續,所以 一味儲嘢,儲極都唔夠。

咁就有機會成為儲物狂,hoarding。根據 DSM 5,是『OCD 強迫症』嘅一種。

 

2) 但点解我又冇呢樣習慣?好多成年女子又冇?

答案:所謂,一樣米養百樣人,心理學叫做 『individual differences』,每個人都有自己嘅性格特質,有唔同的心理因素,而且每個人都有唔同嘅問題,或者問題唔係喺儲野,而係喺其他方面表現出來都唔出奇。在世上,是無人無問題的。

相反,有時同一個心理原因,都會有唔同嘅『manifestation 表徵』,即是表面嘅行為唔同。例如,見到陌生人,或者去到陌生環境,而內心出現不安。有啲人會好靜,睇落佢唔係咁能夠適應新環境。相反,另外有啲人,好似開籠雀咁好多嘢講,仲要好似花蝴蝶咁成場周圍飛,表面睇落呢種人應該唔怕醜,非常能夠適應環境啦,但係啱啱相反,呢種出奇地多嘢講及離奇地周圍 socialise 嘅表徵,往往就係內心不安嘅表現。雖然大家內心也是對陌生產生不安,但表徵就有好明顯分別。另外,後者通常自信比較低,用嘅『自我防衛機制』都比較多,亦唔係咁喜歡自己,唔係咁認識自己,或唔係咁能夠承認自己的問題。如果唔係,都唔洗內心感覺同表面行為差咁遠啦,因為佢地自己不能承受自己內心的不安嘛。

 

3) 又或者小時候已經有那種玩具,但不間斷咁買?

答案:小朋友腦部發展的時候,會比較想有『stimulation 刺激』, 佢哋都有一個傾向,就係喜歡重複鍾意嘅嘢。例如,聽兒歌要聽好多次都唔厭,睇迪士尼卡通睇好多次都唔厭。所以兒歌通常都係節奏簡單, 而且重複又重複。

Social Psychology

點解明明比人搵笨,仍然堅持相信呢?

點解明明比人搵笨,但仍然堅持相信呢?

真心佩服拍檔 Maggie,可以把咁複雜嘅心理學理論,非常簡單直接咁樣講比大家知。歡迎大家 Like 及 Share!

Leon Festinger 非常出名,係 Father of Social Psychology『社會心理學之父』!佢講嘅 cognitive dissonance 『認知不協調』及 cognitive consonance 『認知協調』可以解釋到點解比人搵笨仍然會死撐。

當人發現自己支持嗰件事係唔合理,就會出現『認知不協調』,即是覺得自己點會支持一啲咁樣嘅事情㗎,咁樣內心就會出現 tension。有咩辦法減低內心嘅 tension? 就係死撐,或者用心理學名詞叫做『合理化』。當『合理化』咗嗰件事,內心就會出現『認知協調』,協調咗就冇 tension 啦。

另外有一個研究係咁樣嘅,研究員搵黎一班實驗參加者,將佢哋隨機分開為兩組。兩組實驗參加者同樣要做一啲非常之悶嘅 task。但係A組有少少補償,B組就係免費勞工。

你哋估下A組定B組覺得個task冇咁悶?明白咗『認知不協調』嘅你哋,一定知道答案係B組。

因為已經無啦啦被老點做左免費勞工,如果仲要做一啲好悶嘅 task,咁咪覺得被人終極搵笨囉。覺得自己蠢左,好『認知不協調』啫,唔係咁多人能夠接受自己蠢咗比人搵笨㗎嘛。所以B組嗰班免費勞工,會覺得個task都唔係咁悶啫。因為被老點之後,如果個 task 係 meaningful,都感覺無咁蝕底吖,咁就係以『認知協調』去減低內心比人搵笨的 tension。

除左 Maggie 在 video 講嘅信『世界末日』、或者呢期好熱門嘅話題 #動物傳心術 ,『認知不協調』都可以解釋點解伴侶出軌,仍然死撐話伴侶係好愛自己嘅,只係第三者衰啫。因為承認伴侶唔愛自己的話,即係自己揀錯人、或者自己唔夠第三者好,就會出現『認知不協調』。因為不能相信自己咁笨揀錯人,更不能接受第三者比自己好啦。為咗減低呢D『認知不協調』而帶來的內心 tension,就把原因賴落第三者到,即係死撐唔係自己嘅問題,自己冇揀錯人,只不過係第三者衰之嘛。當賴左落第三者到,自己就無問題啦,咁樣就令到自己可以『認知協調』啦。

覺得好複雜呢~~~ 所以好多人扮有讀心理學,或者報讀一D非正統課程,又話自己係讀心理學嘅,等你出現『認知協調』,你就會以為佢地好猛料囉。

睇下 Maggie 嘅 video 啦:

https://www.youtube.com/watch?v=nhpHvbH17ok&feature=share

 

Cognitive Psychology

點解初戀特別令人懷念?

初戀令人懷念,係因為 Zeigarnik Effect。

簡單講:Zeigarnik Effect 意思係,人有一個傾向,會記得未完成嘅工作,多過已經完成哂嘅工作。後來,Zeigarnik Effect 被用來解釋點解初戀、或者無疾而終嘅戀情,咁令人懷念。

詳細講:當 Bluma Zeigarnik 還是 Kurt Lewin 的學生時 (By the way, Kurt Lewin 係社會心理學家,亦係完形心理學家 (Gestalt psychologist),非常 open-minded,係當時極少數肯收女性入自己門下嘅學者。),Zeigarnik, Lewin 及 lab 的其他同學,好多時都會去大學附近一間 cafe 一齊 hea 下。佢哋發現 cafe 個侍應,當佢哋埋單比錢時,完全記得每一個人的 order 而收錢。咁都唔係咁出奇啫,只不過係個侍應記性好之嘛。但係好有趣地,比完錢,佢哋再問番個侍應頭先每一個人嘅 order,個侍應會即刻唔記得哂。即係,一直未收錢都好記得 order,一收咗錢就乜都唔記得哂。

Zeigarnik 就呢一個咁有趣嘅現象,作出一系列嘅研究。例如,佢把實驗參加者分為兩組,分別叫佢哋做一系列相同嘅 tasks,比如砌砌圖、砌其他野等等。但其中一組做到一半嘅時候,被研究員打斷無得繼續;另外一組就可以完成 tasks。跟住佢就訪問返兩組實驗參加者。研究發現,被打斷無得完成嗰一組嘅實驗參加者,會比起完成哂嗰組嘅實驗參加者,更加記得自己當時做緊個咩 task、點樣做、程序、做到邊度等等。呢一個現像,被稱為 Zeigarnik Effect。

點解人會出現 Zeigarnik Effect 呢?可以用返 Zeigarnik 嘅師傅 Lewin 嘅強項『完形心理學』 (Gestalt psychology) 去解釋。完形心理學的精髓是『the whole is greater than the sum of its parts』。人腦嘅運作係傾向想睇整體,如果畫一個未埋口的圈,嚴格嚟講不應該叫做圈,都無埋口,但人腦會傾向睇到果個係一個圈。又或者,有三條線,A線是水平線,上方有B線是由左下斜向右上,旁邊有C線是由左上斜向右下,而呢三條線都冇黐埋一齊,嚴格嚟講唔係一個三角形,但人會傾向睇到是一個三角形。就係呢一個要d野『完形』嘅心態,令到我哋遇到未完成嘅事情時,內心就出現 tension,一味心掛掛,好想要完成佢,一完成咗就唔記得囉。就是 Zeigarnik Effect。

Image result for Gestalt psychology
Image: Wikipedia

後來,Zeigarnik Effect 被 apply 到唔同情況,例如頭先講過,用嚟解釋點解初戀、或無疾而終嘅戀愛咁令人懷念,係因為都未、或者無,經歷戀愛中的『生老病死』就無咗啦。

另外,可以解釋娘娘用嚟收兵嘅方法,娘娘一定唔會比兵仔『完成』喇,同埋娘娘有時回答有時唔回答,兵仔見到雙藍色 tick 都唔答,就會好掛住娘娘硬係有啲嘢未答佢,咁兵仔就好掛住娘娘。

亦可解釋點解人咁鍾意追電視劇,因為之前嗰晚嘅劇情未完,剛到 climax 就夠鐘,所以個心好掛住,今晚要趕住返屋企追埋套劇。

講多一個,Zeigarnik Effect亦可解釋 procrastination (即是死拖唔肯做功課) 點解令人有咁大壓力,係因為有功課未做,雖然個人去咗玩,但個心一味心掛掛有野未做。